ក្រោយភ្លៀងមេឃស្រលះ! អ្នកសារព័ត៌មាន សុំទោស និងធ្វើកិច្ចសន្យា ៤ចំណុច ជូនមេបញ្ជាការកងរាជអាវុធហត្ថលើផ្ទៃប្រទេស
នៅរសៀលថ្ងៃទី ៣០ ខែវិច្ឆិកា ឆ្នាំ ២០២៥ ក្រោយភ្លៀងធ្លាក់ចុះធ្វើឲ្យមេឃស្រលះឡើងវិញ លោក ផែង វណ្ណៈ (អ្នកសារព័ត៌មាន) បានទទួលការអនុញ្ញាតិពី ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ចូលជួបពិភាក្សា និងសុំទោសជាផ្លូវការ។
ក្នុងកិច្ចជួបប្រជុំមានការចូលរួមពីមេបញ្ជាការដ្ឋានកងរាជអាវុធហត្ថលើផ្ទៃប្រទេស និងមន្ត្រីពាក់ព័ន្ធ ជាមួយបរិយាកាសស្និទ្ធស្នាល និងយោគយល់ល្អ។ ក្នុងឱកាសនោះ លោក ផែង វណ្ណៈ បានបញ្ជាក់ថា ខ្លួនបានប្រើពាក្យសម្តីមួយចំនួន ដែលមាន «ចន្លោះប្រហោង» និងអាចនាំឲ្យកើតការយល់ច្រឡំ កក៏ដូចជាប៉ះពាល់ដល់តម្លៃសិលធម៌ និងកេរ្តិ៍ឈ្មោះនៃស្ថាប័នកងរាជអាវុធហត្ថ។
ដើម្បីបង្ហាញពីទឹកចិត្តទូលមកវិញ និងការយល់ឃើញច្បាស់លាស់លើកម្រិតភារកិច្ចវិជ្ជាជីវៈ អ្នកសារព័ត៌មានបានធ្វើ កិច្ចសន្យាចំនួន ៤ ចំណុច ជូនដល់បញ្ជាការដ្ឋានកងរាជអាវុធហត្ថលើផ្ទៃប្រទេស រួមមាន៖
បន្តរាយការណ៍ព័ត៌មានដោយគោរពតាមបញ្ញត្តិច្បាប់ និងក្រមសីលធម៌វិជ្ជាជីវៈអ្នកសារព័ត៌មាន។
មិនប្រើពាក្យសម្តី ឬអត្ថបទណា ដែលអាចបង្កអយុត្តិធម៌ ឬប៉ះពាល់ដល់កេរ្តិ៍ឈ្មោះស្ថាប័នកម្លាំងសន្តិសុខឡើយ។
សហការជិតស្និទ្ធជាមួយអង្គភាពពាក់ព័ន្ធ ក្នុងការផ្ដល់ និងបញ្ជាក់ព័ត៍មាន ព្រមទាំងពិនិត្យផ្ទៀងផ្ទាត់មុនពេលផ្សព្វផ្សាយ។
ប្រើប្រាស់វេទិកាព័ត៌មានរបស់ខ្លួន ដើម្បីជួយផ្សព្វផ្សាយព័ត៌មានពិត និងលើកកម្ពស់រូបភាពវិជ្ជមានរបស់កម្លាំងកងរាជអាវុធហត្ថ ក្នុងកិច្ចការការពារសន្តិសុខ សណ្ដាប់ធ្នាប់សង្គម និងសន្តិភាព។
ក្នុងនាមជាម្ចាស់ អង្គភាពសារព័ត៌មាន លោក ផែង វណ្ណៈ បានថ្លែងសូមគោរពអំណរគុណយ៉ាងជ្រាលជ្រៅជូនដល់ ឯកឧត្តមនាយឧត្តមសេនីយ៍ សៅ សុខា ដែលបានយោគយល់ និងផ្ដល់ឱកាសដ៏មូល្យមានអោយខ្លួនអាចបន្តសហការការងារ ក្នុងការផ្ដល់ព័ត៌មានពិត ដើម្បីចូលរួមកែលម្អ និងកាត់បន្ថយចំណុចអវិជ្ជមានផ្សេងៗ ក្នុងសង្គម។
លោក ផែង វណ្ណៈ ក៏បានបញ្ជាក់ថា ខ្លួននឹងយកព្រឹត្តិការណ៍នេះជាបទពិសោធន៍សំខាន់ក្នុងការកែលម្អខ្លួនឯង និងបន្តធ្វើការងារផ្តល់ព័ត៌មានដោយមានទំនួលខុសត្រូវខ្ពស់ ប្រកបដោយកិរិយាសុជីវធម៌ និងគោរពច្បាប់ជានិច្ច៕
