ស្វាមីកំពុងបំពេញភារកិច្ចការពារបូរណភាពទឹកដីនៅសមរភូមិជួរមុខ ខណៈភរិយាមានទម្ងន់ជិតដល់ថ្ងៃសម្រាល បានភៀសសឹកមកជ្រកកោននៅភ្នំពេញ ទទួលបានការយកចិត្តទុកដាក់ពី ឧត្តមសេនីយ៍ឯក រ័ត្ន ស្រ៊ាង
រាជធានីភ្នំពេញ៖ ស្ត្រីម្នាក់ឈ្មោះ ប្រាក់ ពិសី អាយុ ២៣ ឆ្នាំ ជាភរិយារបស់វីរកងទ័ពដែលកំពុងឈរជើងបំពេញភារកិច្ចការពារប្រទេសនៅសមរភូមិជួរមុខ ទិសមុំបី ខេត្តព្រះវិហារ បច្ចុប្បន្នមានទម្ងន់ជិតដល់ថ្ងៃសម្រាល (គ្រោងសម្រាលក្នុងសប្តាហ៍ក្រោយ) បានសម្រេចចិត្តភៀសសឹកចេញពីខេត្តព្រះវិហារ មកជ្រកកោនជាមួយបងប្អូន នៅភូមិក្រាំងស្វាយ សង្កាត់ព្រែកកំពឹស ខណ្ឌដង្កោ រាជធានីភ្នំពេញ ដើម្បីសុវត្ថិភាព និងភាពងាយស្រួលក្នុងការថែទាំសុខភាព។
ករណីដ៏គួរឱ្យអាណិត និងគួរឱ្យកោតសរសើរនេះ ត្រូវបានដឹងដល់ ឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស មេបញ្ជាការកងរាជអាវុធហត្ថរាជធានីភ្នំពេញ និងជាប្រធានក្រុមការងារចុះជួយសង្កាត់ព្រែកកំពឹស ដែលបានបង្ហាញការយកចិត្តទុកដាក់យ៉ាងខ្ពង់ខ្ពស់ចំពោះគ្រួសារកងទ័ពជួរមុខ។
ជាបន្តបន្ទាប់ ឧត្តមសេនីយ៍ឯក រ័ត្ន ស្រ៊ាង បានចាត់តាំងក្រុមការងារ ចុះទៅសួរសុខទុក្ខដោយផ្ទាល់ និងនាំយកអំណោយឧបត្ថម្ភជូន រួមមាន ថវិកាចំនួន ១,០០០,០០០ រៀល, អង្ករ ០៣ ការ៉ុង, ទឹកសុទ្ធ ០៤ កេស, ទឹកត្រី និងទឹកស៊ីអ៊ីវ ចំនួន ០២ យួរ សម្រាប់ប្រើប្រាស់បណ្តោះអាសន្ន ក្នុងអំឡុងពេលស្នាក់នៅ។
លើសពីនេះទៀត ឧត្តមសេនីយ៍ឯក ក៏បានចាត់ក្រុមគ្រូពេទ្យរបស់កងរាជអាវុធហត្ថរាជធានីភ្នំពេញ ឲ្យតាមដានសុខភាព និងថ្ងៃសម្រាលបុត្ររបស់ស្ត្រីមានផ្ទៃពោះរូបនេះយ៉ាងដិតដល់ ព្រមទាំងត្រៀមរថយន្តសង្គ្រោះ ដើម្បីជូនទៅសម្រាលនៅមន្ទីរពេទ្យ នៅពេលដល់ថ្ងៃកំណត់ ដើម្បីធានាសុវត្ថិភាពទាំងម្តាយ និងទារក។
ជាមួយគ្នានេះផងដែរ ឧត្តមសេនីយ៍ឯក រ័ត្ន ស្រ៊ាង ក៏បានសន្យាថា ក្រោយពេលសម្រាលបុត្ររួចហើយ ក្រុមការងារនឹងបន្តជួយឧបត្ថម្ភជាអង្ករ ថវិកា និងគ្រឿងឧបភោគបរិភោគផ្សេងៗជាបន្តបន្ទាប់ ដើម្បីជួយសម្រួលជីវភាពគ្រួសារវីរកងទ័ព រហូតដល់សភាពការណ៍តាមព្រំដែន វិលត្រឡប់មកប្រក្រតីដូចដើមវិញ។
សកម្មភាពនេះបានបង្ហាញពីស្មារតីទទួលខុសត្រូវ ក្តីមេត្តាករុណា និងការយកចិត្តទុកដាក់យ៉ាងជ្រាលជ្រៅរបស់ថ្នាក់ដឹកនាំកងរាជអាវុធហត្ថ ចំពោះកងកម្លាំងជួរមុខ និងក្រុមគ្រួសាររបស់ពួកគាត់ ដែលកំពុងលះបង់ដើម្បីការពារបូរណភាពទឹកដី និងសុខសន្តិភាពជាតិ៕
