សេចក្តីបំភ្លឺព័ត៌មាន របស់អង្គភាពសារព័ត៌មាន រស្មីញូស៍
អង្គភាពសារព័ត៌មាន រស្មីញូស៍ សូមធ្វើការបំភ្លឺជូនសាធារណជន ពាក់ព័ន្ធនឹងព័ត៌មានដែលបានផ្សព្វផ្សាយ និងចែករំលែកនៅថ្ងៃទី៤ ខែមេសា ឆ្នាំ២០២៦ ស្តីពីករណីសង្ស័យថា មានការបើកដៃឱ្យធ្វើសកម្មភាពបូមរ៉ែមាសខុសច្បាប់ក្នុងខេត្តរតនគិរី និងការចោទប្រកាន់លើបុគ្គលម្នាក់ថាជាអ្នករត់ការបិទមាត់សមត្ថកិច្ច ដែលជាព័ត៌មានមិនពិត។
យោងតាមការបំភ្លឺរបស់ក្រសួងបរិស្ថាន បានបញ្ជាក់ថា មន្ត្រីជំនាញបានចុះពិនិត្យ និងផ្ទៀងផ្ទាត់ទីតាំងដែលបានចុះផ្សាយ ហើយរកឃើញថា ទីតាំងនោះមិនស្ថិតនៅក្នុងតំបន់ការពារធម្មជាតិឡើយ។ ទីតាំងខាងលើស្ថិតក្នុងតំបន់គម្រោងអាជីវកម្មខ្សាច់សំណង់ របស់សហគ្រាសបញ្ញារិទ្ធិ មានទីតាំងនៅភូមិប៉ាដល ឃុំសេសាន ស្រុកអូរយ៉ាដាវ ខេត្តរតនគិរី។
ជាមួយគ្នានេះផងដែរ ក្រសួងបរិស្ថានបានចាត់មន្ត្រីជំនាញចុះពិនិត្យទីតាំងជាក់ស្តែង និងពិភាក្សាជាមួយអាជ្ញាធរមូលដ្ឋាន និងភាគីពាក់ព័ន្ធ។ លទ្ធផលបានបង្ហាញថា ក្រុមហ៊ុនមានអាជ្ញាបណ្ណត្រឹមត្រូវ ដោយមានអាជ្ញាបណ្ណអណ្តូងរ៉ែបើក និងការដ្ឋានវាយថ្ម លេខ ១២៤៣២ រថ.អខស.អប ចុះថ្ងៃទី១៨ ខែកុម្ភៈ ឆ្នាំ២០២៦ ដែលចេញដោយក្រសួងរ៉ែ និងថាមពល និងមានកិច្ចសន្យាការពារបរិស្ថាន តាមលិខិតលេខ ១០៤២០/១២២៤ ប.ស្ថ/វហប ចុះថ្ងៃទី២៦ ខែធ្នូ ឆ្នាំ២០២៥ ដែលចេញដោយក្រសួងបរិស្ថានផងដែរ។
អាស្រ័យហេតុនេះ អង្គភាពសារព័ត៌មាន រស្មីញូស៍ សូមជម្រាបជូនសាធារណជន មេត្តាជ្រាបថា ព័ត៌មានដែលបានផ្សព្វផ្សាយមុននេះ គឺមិនបានឆ្លុះបញ្ចាំងពីការពិតជាក់ស្តែងទេ ហើយអាចបណ្តាលឱ្យមានការយល់ច្រឡំ និងប៉ះពាល់ដល់កិត្តិយស និងសេចក្តីថ្លៃថ្នូររបស់មន្ត្រីមានសមត្ថកិច្ច។
ទន្ទឹមនឹងនេះ ក្រសួងបរិស្ថានបាន និងកំពុងបន្តអនុវត្តវិធានការយ៉ាងតឹងរឹង ក្នុងការត្រួតពិនិត្យ និងតាមដានសកម្មភាពអាជីវកម្មរបស់សហគ្រាសបញ្ញារិទ្ធិ។ ក្នុងករណីរកឃើញថា មានការអនុវត្តផ្ទុយនឹងគោលការណ៍បច្ចេកទេស កិច្ចសន្យាការពារបរិស្ថាន ឬមិនគោរពតាមលិខិតអនុញ្ញាត នោះអាជ្ញាធរនឹងចាត់វិធានការតាមច្បាប់ភ្លាមៗ។
អង្គភាពសារព័ត៌មាន រស្មីញូស៍ សូមអរគុណចំពោះសាធារណជនដែលបានតាមដាន និងគាំទ្រ ហើយសូមអំពាវនាវឱ្យពិនិត្យប្រភពព័ត៌មានឱ្យបានច្បាស់លាស់ មុននឹងចែករំលែកបន្ត។
