រដ្ឋបាលខេត្តស្ទឹងត្រែង រៀបចំពិធីថ្វាយព្រះពរ ក្នុងឱកាសព្រះរាជពិធីបុណ្យចម្រើនព្រះជន្ម សម្ដេចព្រះវររាជមាតាជាតិខ្មែរ
ខេត្តស្ទឹងត្រែង៖ រដ្ឋបាលខេត្តស្ទឹងត្រែង នៅថ្ងៃទី១៩ ខែមិថុនា ឆ្នាំ២០២៦ បានរៀបចំពិធីថ្វាយព្រះពរ ក្នុងឱកាសព្រះរាជពិធីបុណ្យចម្រើនព្រះជន្មគម្រប់ ៩០ ព្រះវស្សា យាងចូល ៩១ ព្រះវស្សា របស់ សម្ដេចព្រះវររាជមាតាជាតិខ្មែរ នរោត្តម មុនិនាថ សីហនុ ប្រកបដោយបរិយាកាសអធិកអធម និងពោរពេញដោយសេចក្ដីស្មោះស្ម័គ្រថ្វាយព្រះរាជបូជនីយកិច្ច។
ពិធីដ៏មានអត្ថន័យនេះ បានប្រព្រឹត្តទៅក្រោមវត្តមានថ្នាក់ដឹកនាំខេត្ត មន្ត្រីរាជការ កងកម្លាំងប្រដាប់អាវុធ ព្រមទាំងប្រជាពលរដ្ឋជាច្រើនរូប ដែលបានអញ្ជើញចូលរួមយ៉ាងកុះករ ដើម្បីសម្ដែងនូវព្រះកតញ្ញូកតវេទិតាធម៌ និងការគោរពស្រឡាញ់ដ៏ជ្រាលជ្រៅចំពោះព្រះមហាករុណាទិគុណរបស់សម្ដេចព្រះវររាជមាតាជាតិខ្មែរ។
ក្នុងឱកាសនោះ អង្គពិធីបានលើកឡើងពីព្រះរាជបេសកកម្ម និងព្រះរាជសកម្មភាពដ៏ឧត្តុង្គឧត្តមរបស់សម្ដេចព្រះវររាជមាតាជាតិខ្មែរ ដែលបានយកព្រះទ័យទុកដាក់ចំពោះសុខទុក្ខ និងសុខុមាលភាពរបស់ប្រជារាស្ត្រខ្មែរ ព្រមទាំងបានរួមចំណែកយ៉ាងសំខាន់ក្នុងបុព្វហេតុជាតិ សាសនា និងព្រះមហាក្សត្រ។
ជាមួយគ្នានេះ ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទាំងអស់ បានលើកហត្ថប្រណម្យ បួងសួងដល់វត្ថុស័ក្តិសិទ្ធិក្នុងលោក សូមតាមថែរក្សា និងប្រោះព្រំប្រទានពរជ័យថ្វាយដល់សម្ដេចព្រះវររាជមាតាជាតិខ្មែរ សូមព្រះអង្គមានព្រះរាជសុខភាពល្អបរិបូរណ៍ ព្រះកាយពលមាំមួន ព្រះបញ្ញាញាណភ្លឺថ្លា និងគង់ប្រថាប់ជាម្លប់ដ៏ត្រជាក់ត្រជុំដល់ប្រជាពលរដ្ឋខ្មែរជានិច្ចនិរន្តរ៍៕
