អភិបាលខេត្តស្ទឹងត្រែងណែនាំឱ្យពង្រឹងជំនាញឆ្មបបុរាណជាជនជាតិដើមភាគតិច
ខេត្តស្ទឹងត្រែង- អភិបាលខេត្តស្ទឹងត្រែងឱ្យមន្ទីរសុខាភិបាល ចាត់តាំងក្រុមគ្រូពេទ្យជំនាញ ចុះទៅបណ្ដុះបណ្ដាលបន្តដល់ ឆ្មបបុរាណជាជនជាតិដើមភាគតិច ឬឆ្មបនៅតាមមូលដ្ឋានដើម្បីទទួលបានការបណ្ដុះបណ្ដាល និងមានជំនាញទទួលបានការបញ្ជាក់ត្រឹមត្រូវ ពីមន្ទីរសុខាភិបាល ។
ក្នុងពិធីអបអរសាទរទិវាជនជាតិដើមភាគតិចពិភពលោកលើកទី៣២ និងលើកទី២២ នៅកម្ពុជា ក្រោមប្រធានបទ "ការលើកតម្កើងតួនាទីឆ្មបជាជនជាតិដើមភាគតិច ដើម្បីការពារជីវិត និងសុខុមាលភាព ធ្វើឡើងនៅខេត្តស្ទឹងត្រែងថ្ងៃទី១០សីហា២០២៦ ឯកឧត្តមសរសុពុត្រាអភិបាលខេត្តមានប្រសាន៍បន្តថា៖ មន្ត្រីសុខាភិបាលត្រូវយកចិត្តទុកដាក់បណ្ដុះបណ្ដាលបន្តជូនម៉ែៗដែលជាឆ្មប របស់ជនជាតិដើមភាគតិចបន្ថែម ដើម្បីដើរឱ្យទាន់បច្ចេកវិទ្យា។
ឯកឧត្តមមានប្រសាសន៍បន្តថា ថ្វីត្បិតតែពួកគាត់ជាឆ្មបបុរាណ តែយើងមិនបោះបង់ចោលគាត់ទេ ព្រោះការឆ្លងទន្លេរបស់ស្តី្រ (សម្រាលកូន) គឺពិបាកណាស់។ (សំឡេង)អញ្ចឹងត្រូវឱ្យម៉ែៗយល់ អំពីលក្ខណៈសង្គ្រោះ ហើយមិនមែន រំលាយចោលឆ្មបបុរាណទេ ក៏ប៉ុន្តែយកឆ្មបបុរាណ មកបណ្ដុះបណ្ដាល ដើម្បីឲ្យទាន់សភាពការណ៍ ហើយយើងរួមគ្នា ជួយសង្គ្រោះជីវិតរបស់ ស្ត្រីដែលឆ្លងទន្លេ លើគ្រប់រូបភាពទាំង ឆ្មប នៅក្នុងមណ្ឌលសុខភាព និងមន្ទីពេទ្យបង្អែក ទាំងឆ្មបបុរាណនៅតាមមូលដ្ឋាន ។
លោកហឿនសុខ ប្រជាពលរដ្ឋជនជាតិកាវែតរស់នៅភូមិទាក់ទាម ឃុំសន្តិភាពស្រុកសៀមប៉ាងខេត្តស្ទឹងត្រែង តំណាងឱ្យបងប្អូនជនជាតិមកពីខេត្តចំនួន១៥ បានគាំទ្រការគិតគូរបស់អភិបាលខេត្ត ព្រោះចំណុចនេះបងប្អូនជនជាតិក៍បានលើកជាសំណូមពរជូនថ្នាក់ដឹកនាំដែរ។
លោកបន្តថា៖បងប្អូនជនជាតិបច្ចុប្បន្នរក្សាបាននូវប្រពៃណី ភាសារ តែសម្លៀកបំពាក់និងរបស់របរប្រើប្រាសផ្សេងៗបានដើរទៅតាមសម័យអភិវឌ្ឍហើយ ដូចនេះបានរាជរដ្ឋាភិបាលយកចិត្តទុកដាក់ ផ្នែកសុខភាពទៀត ធ្វើការរស់នៅកាន់តែមានភាពកក់ក្តៅ កសាងជីវភាពបានរីកចម្រើន ឡើង។
សូមបញ្ជាក់ថា ទិវាជនជាតិដើមភាគតិចពិភពលោកលើកទី៣២ និងលើកទី២២នៅកម្ពុជានេះត្រូវបានរាជរដ្ឋាភិបាលសម្រេចឱ្យក្រសួងអភិវឌ្ឍន៍ជនបទធ្វើឡើងនៅខេត្តស្ទឹងត្រែងដែលមានបងប្អូនជនជាតិមកពីខេត្តចំនួន១៥ ចូលរួម និងបានដាក់តាំងស្តង់ម្ហូបអាហារ សម្ភារៈប្រើប្រាស់ សម្លៀកបំពាក់ និងបានសម្តែងរបាំប្រពៃណីជូនអង្គពិធីផងដែរ៕
អត្ថបទ÷កុល សាររ័ត្ន ស្ទឹងត្រែងថ្ងៃទី១០ សីហា ២០២៦
