ពន្ធគយបដិការ(Reciprocal Tariffs) ដែលរដ្ឋាភិបាលសហរដ្ឋអាមេរិកបានកំណត់យកក្នុងអត្រា ១៩% សម្រាប់ទំនិញនាំចូលពីប្រទេសកម្ពុជានឹងត្រូវលុបចោលដោយស្វ័យប្រវត្តិ បន្ទាប់ពីតុលាការកំពូលសហរដ្ឋអាមេរិកសម្រេចកាលពីពេលថ្មីៗ។ នេះបើតាមលោក ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា(CDC)។
ថ្លែងប្រាប់អ្នកព័ត៌មានក្នុងកិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៦ កាលពីថ្ងៃទី៤ ខែមីនា ឆ្នាំ២០២៦ លោក ចាន់ថុល ឱ្យដឹងថា ពន្ធបដិការដែលរដ្ឋាភិបាលអាមេរិកប្រកាសយកពីប្រទេសនានាលើពិភពលោកកាលពីដើមខែមេសា និងចូលជាធរមានចាប់ពីថ្ងៃទី១ ខែសីហា ឆ្នាំ២០២៥ នៅពេលនេះ ត្រូវបានតុលាការកំពូលអាមេរិកប្រកាសថាខុសច្បាប់អំណាចសេដ្ឋកិច្ចបន្ទាន់អន្តរជាតិ(IEEPA)។ លោកបន្តថា បន្ទាប់ពីការសម្រេចរបស់តុលាការកំពូល ពន្ធបដិការដែលរដ្ឋាភិបាលអាមេរិកកំណត់យកពីកម្ពុជា ក្នុងអត្រា ១៩% នឹងត្រូវបានលុបចោលដោយស្វ័យប្រវត្តិ។
លោកថ្លែងថា៖«កាលពីថ្ងៃទី ២០ ខែកុម្ភៈ តុលាការកំពូលអាមេរិកបានប្រកាសថា ពន្ធបដិការរបស់លោកប្រធានាធិបតី ដូណាល់ ត្រាំ គឺខុសច្បាប់អំណាចសេដ្ឋកិច្ចបន្ទាន់អន្តរជាតិ(IEEPA) និងត្រូវដកចេញ»។
លោកលើកឡើងទៀតថា ទោះយ៉ាងណាក្រោមមាត្រា ១២២ នៃច្បាប់ពាណិជ្ជកម្ម ឆ្នាំ១៩៧៤ គឺរដ្ឋាភិបាលអាមេរិកនៅតែអាចអនុវត្តការយកពន្ធបន្ថែមថ្មីក្នុងអត្រា ១៥% បូកបន្ថែមលើអត្រាពន្ធមូលដ្ឋាន MFN សម្រាប់រាល់គ្រប់ទំនិញនាំចូលពីបរទេសទាំងអស់ក្នុងរយៈពេល ១៥០ថ្ងៃ។
យ៉ាងណាមិញ ក្រោយ ១៥០ថ្ងៃ ប្រទេសនីមួយៗរួមទាំងកម្ពុជាគឺត្រូវរង់ចាំការសម្រេចបន្ថែមពីសំណាក់រដ្ឋាភិបាលអាមេរិក។
លោកនិយាយថា៖«ក្រោយពី ១៥០ ថ្ងៃ ខ្ញុំនិយាយភាសាសាមញ្ញថាក្នុងថង់យាមរបស់គាត់ដកមួយប៉ិប មាត្រាលេខ ៣០១ អាចយកមកប្រើដាក់ពន្ធលើប្រទេសណាក៏បានដែរ ដកពីថង់យាមមួយទៀត មាត្រា ២៣២ ដកមួយទៀត ៣៣៨ អ៊ីចឹងយើងមិនដឹងថាតើ គាត់ប្រើមាត្រាមួយណា ដើម្បីយកពន្ធបន្ថែម ពេល ១៥០ ថ្ងៃ ចប់សព្វគ្រប់»។
ប្រធានាធិបតីអាមេរិក លោក ដូណាល់ ត្រាំ កាលពីថ្ងៃទី២ ខែមេសា ឆ្នាំ២០២៥ បានប្រកាសយកពន្ធបដិការសម្រាប់ទំនិញនាំចូលពីគ្រប់ប្រទេស ក្នុងនោះប្រទេសកម្ពុជា ត្រូវបានកំណត់ក្នុងអត្រា ៤៩%។ ទោះយ៉ាងណា បន្ទាប់ពីកិច្ចខិតខំរបស់រដ្ឋាភិបាលក្នុងការចរចាជាបន្តបន្ទាប់ គឺអត្រាពន្ធនេះត្រូវបានទម្លាក់មកនៅត្រឹម ៣៦% និងចុងក្រោយមកនៅត្រឹម ១៩% ដែលបានចូលជាធរមាន កាលពីថ្ងៃទី១ ខែសីហា ឆ្នាំ២០២៥។
ទិន្នន័យអគ្គនាយកដ្ឋានគយ និងរដ្ឋាករកម្ពុជា(GDCE) បង្ហាញថា ក្នុងឆ្នាំ២០២៥ ការធ្វើពាណិជ្ជកម្មរវាងកម្ពុជា-អាមេរិក មានទឹកប្រាក់សរុប ១៣,១៥ ពាន់លានដុល្លារ កើន ២៩,២% បើធៀបនឹងឆ្នាំ២០២៤ ក្នុងនោះកម្ពុជានាំចេញ ១២,៧៣ ពាន់លានដុល្លារ កើន ២៨,៥% និងនាំចូលមកវិញ ៤១៧,០៧ លានដុល្លារ កើន ៥៧,៨%។ អាមេរិក គឺជាដៃគូពាណិជ្ជកម្មធំជាងគេទី២ របស់កម្ពុជា បន្ទាប់ពីប្រទេសចិន។ បច្ចុប្បន្នទំនិញដែលកម្ពុជានាំទៅទីផ្សារអាមេរិកភាគច្រើនជាផលិតផលសម្លៀកបំពាក់ ស្បែកជើង កាបូបធ្វើដំណើរ កង់ និងសម្បកកង់រថយន្ត៕