អាជ្ញាធរក្រុងប៉ោយប៉ែត អំពាវនាវពលរដ្ឋគោរពប្រពៃណីខ្មែរ និងហាមលេងបាញ់ទឹកក្នុងឱកាសបុណ្យចូលឆ្នាំថ្មី
បន្ទាយមានជ័យ ៖ នាព្រឹកថ្ងៃទី១៣ ខែមេសា ឆ្នាំ២០២៦ ដែលត្រូវនឹងថ្ងៃ១១រោច ខែចែត្រ ឆ្នាំពុទ្ធសករាជ ២៥៦៩ ឯកឧត្តមបណ្ឌិត ប៉ាន់ ខែមប៊ុនថន ប្រធានក្រុមការងាររាជរដ្ឋាភិបាលចុះជួយក្រុងប៉ោយប៉ែត រួមជាមួយលោក គាត ហ៊ុល អភិបាលក្រុងប៉ោយប៉ែត និងលោក ព្រហ្ម ពិសិដ្ឋ អធិការនគរបាលក្រុង បានអញ្ជើញចុះផ្សព្វផ្សាយ និងណែនាំដល់បងប្អូនប្រជាពលរដ្ឋនៅក្នុងមូលដ្ឋាន។
ក្នុងឱកាសនោះ អាជ្ញាធរបានលើកទឹកចិត្តឱ្យប្រជាពលរដ្ឋចូលរួមលេងល្បែងប្រពៃណីខ្មែរ ដែលជាបេតិកភណ្ឌវប្បធម៌ដ៏មានតម្លៃរបស់ដូនតា ដើម្បីអភិរក្ស និងបន្តស្នាដៃប្រពៃណីឲ្យនៅរឹងមាំ។
ជាមួយគ្នានេះដែរ អាជ្ញាធរបានដាក់ចេញបម្រាមហាមឃាត់មិនឱ្យមានសកម្មភាពបាញ់ទឹក ឬគប់ទឹក ដែលត្រូវបានចាត់ទុកថាជាទង្វើប្រាសចាកពីប្រពៃណីខ្មែរ និងអាចបង្កឱ្យមានអសន្តិសុខសង្គមក្នុងអំឡុងពេលបុណ្យ។
លើសពីនេះ ឯកឧត្តមបណ្ឌិត ប៉ាន់ ខែមប៊ុនថន ក៏បានសំណូមពរដល់ប្រជាពលរដ្ឋទាំងអស់ឱ្យចូលរួមសន្សំសំចៃទឹកប្រើប្រាស់ ដោយសារតែរដូវប្រាំងមានកម្តៅខ្ពស់ ដែលអាចបណ្តាលឱ្យខ្វះខាតទឹកនៅតាមតំបន់មួយចំនួន។
អាជ្ញាធរបានអំពាវនាវឱ្យប្រជាពលរដ្ឋទាំងអស់ចូលរួមគោរពតាមការណែនាំ និងសហការគ្នារក្សាសន្តិសុខ សណ្តាប់ធ្នាប់ និងអភិរក្សប្រពៃណីជាតិ ដើម្បីធ្វើឱ្យពិធីបុណ្យចូលឆ្នាំថ្មីប្រពៃណីជាតិខ្មែរ ប្រព្រឹត្តទៅដោយសុខសាន្ត និងមានអត្ថន័យ។
