BREAKING NEWS៖ មន្ត្រីជាន់ខ្ពស់២រូប និងជនសង្ស័យ២នាក់ ត្រូវបញ្ជូនទៅតុលាការ ពាក់ព័ន្ធករណីស៊ីសំណូក និងសម្អាតប្រាក់
ភ្នំពេញ ៖ អង្គភាពប្រឆាំងអំពើពុករលួយ បានសម្រេចបញ្ជូនមន្ត្រីជាន់ខ្ពស់២រូប ព្រមទាំងជនសង្ស័យ២នាក់ទៀត ទៅកាន់តុលាការ នៅរសៀលថ្ងៃទី២២ ខែមេសា ឆ្នាំ២០២៦នេះ ពាក់ព័ន្ធនឹងករណីសង្ស័យទទួលសំណូកពីក្រុមប្រតិបត្តិការ Online Scams និងការសម្អាតប្រាក់។
បើតាមការបញ្ជាក់ពីលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បានឲ្យដឹងថា មន្ត្រីដែលត្រូវបានបញ្ជូនរួមមាន ឧត្តមសេនីយ៍ឯក អ៊ុក ហៃសីឡា អគ្គនាយករងអន្តោរប្រវេសន៍ និងឧត្តមសេនីយ៍ទោ សរ សំណាង ស្នងការរងរាជធានីភ្នំពេញ ព្រមទាំងជនសង្ស័យ២នាក់ទៀត។
ប្រភពដដែលបញ្ជាក់ថា ការបញ្ជូននេះធ្វើឡើងនៅវេលាម៉ោងប្រមាណ ៤៖៣០នាទីរសៀល ដើម្បីអនុវត្តន៍នីតិវិធីតាមផ្លូវច្បាប់ បន្ទាប់ពីមានការស្រាវជ្រាវ និងប្រមូលភស្តុតាងពាក់ព័ន្ធនឹងសកម្មភាពស៊ីសំណូកពីបណ្ដាញបោកប្រាស់តាមអនឡាញ និងការសម្អាតប្រាក់។
សំណុំរឿងនេះកំពុងទាក់ទាញការចាប់អារម្មណ៍យ៉ាងខ្លាំងពីសាធារណជន ខណៈអាជ្ញាធរបានបន្តចាត់វិធានការយ៉ាងតឹងរឹងលើបទល្មើសពុករលួយ និងបទល្មើសបច្ចេកវិទ្យា ដែលកំពុងកើតមានកាន់តែច្រើននៅក្នុងសង្គម៕
