កិច្ចពិភាក្សារវាងអ្នកសារព័ត៌មានរៀបចំដោយ ក្លិបអ្នកកាសែតកម្ពុជា និងCBC ស្តីពី «ការលើកកម្ពស់ ការប្រើប្រាស់ឥណទាន ប្រកបដោយសុវត្ថិភាព
ភ្នំពេញ៖ នៅព្រឹកថ្ងៃទី២៩ ខែឧសភា ឆ្នាំ២០២៦ លោក ពុយ គា ប្រធានក្លឹបអ្នកកាសែតកម្ពុជា (ក.ស.ក) និង CBC បានរៀបចំវេទិកាពិភាក្សាក្រោមប្រធានបទ «ការលើកកម្ពស់ការប្រើប្រាស់ឥណទានប្រកបដោយសុវត្ថិភាព» ក្នុងគោលបំណងរួមចំណែកលើកកម្ពស់ចំណេះដឹងផ្នែកហិរញ្ញវត្ថុ និងជំរុញឱ្យមានការប្រើប្រាស់ប្រាក់កម្ចីប្រកបដោយការទទួលខុសត្រូវនៅក្នុងសង្គម។
កិច្ចពិភាក្សារវាងអ្នកសារព័ត៌មាន និងអ្នកជំនាញក្នុងវិស័យហិរញ្ញវត្ថុ ត្រូវបានរៀបចំឡើង ដើម្បីពង្រឹងការយល់ដឹង និងលើកកម្ពស់ការប្រើប្រាស់ឥណទានប្រកបដោយសុវត្ថិភាព សំដៅជួយប្រជាពលរដ្ឋឱ្យយល់ដឹងកាន់តែច្បាស់ពីអត្ថប្រយោជន៍ ហានិភ័យ និងការគ្រប់គ្រងបំណុលឱ្យមានប្រសិទ្ធភាព។
កិច្ចពិភាក្សានេះ បានផ្តោតសំខាន់លើការផ្សព្វផ្សាយចំណេះដឹងហិរញ្ញវត្ថុ ការប្រើប្រាស់ឥណទានឱ្យសមស្របតាមសមត្ថភាពសេដ្ឋកិច្ចរបស់ខ្លួន និងការបង្ការហានិភ័យដែលអាចកើតមានពីការខ្ចីប្រាក់លើសសមត្ថភាពសងត្រឡប់។
អ្នកជំនាញក្នុងវិស័យហិរញ្ញវត្ថុ បានលើកឡើងថា ការប្រើប្រាស់ឥណទានប្រកបដោយការទទួលខុសត្រូវ គឺជាកត្តាសំខាន់ក្នុងការរក្សាស្ថិរភាពហិរញ្ញវត្ថុគ្រួសារ និងជួយជំរុញសកម្មភាពសេដ្ឋកិច្ច។ ជាមួយគ្នានេះ ពួកគេក៏បានណែនាំឱ្យប្រជាពលរដ្ឋពិនិត្យលក្ខខណ្ឌកម្ចី អត្រាការប្រាក់ និងផែនការសងប្រាក់ឱ្យបានច្បាស់លាស់ មុនធ្វើការសម្រេចចិត្តខ្ចីប្រាក់។
ចំណែកអ្នកសារព័ត៌មាន ត្រូវបានជំរុញឱ្យចូលរួមផ្សព្វផ្សាយព័ត៌មានដែលមានភាពត្រឹមត្រូវ និងអប់រំសាធារណជនអំពីការគ្រប់គ្រងហិរញ្ញវត្ថុផ្ទាល់ខ្លួន ដើម្បីរួមចំណែកកាត់បន្ថយហានិភ័យនៃបំណុល និងលើកកម្ពស់វប្បធម៌ប្រើប្រាស់ឥណទានដោយមានការយល់ដឹង។
កិច្ចពិភាក្សានេះ ត្រូវបានមើលឃើញថា ជាវេទិកាសំខាន់មួយក្នុងការបង្កើនការសហការរវាងវិស័យសារព័ត៌មាន និងអ្នកជំនាញហិរញ្ញវត្ថុ ក្នុងគោលបំណងលើកកម្ពស់ចំណេះដឹងហិរញ្ញវត្ថុ និងជំរុញការប្រើប្រាស់ឥណទានប្រកបដោយសុវត្ថិភាពនៅកម្ពុជា៕
