ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធាន ស.ស.យ.ក. អញ្ជើញចូលរួមបើកវិញ្ញាសាប្រឡងបាក់ឌុប ឆ្នាំ២០២៦ នៅវិទ្យាល័យព្រះសីសុវត្ថិ

 ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធាន ស.ស.យ.ក. អញ្ជើញចូលរួមបើកវិញ្ញាសាប្រឡងបាក់ឌុប ឆ្នាំ២០២៦ នៅវិទ្យាល័យព្រះសីសុវត្ថិ

ភ្នំពេញ៖ នាព្រឹកថ្ងៃចន្ទ ទី១០ ខែសីហា ឆ្នាំ២០២៦ លោក ជា ខេមា អភិបាល នៃគណៈអភិបាលខណ្ឌដូនពេញ បានអញ្ជើញអមដំណើរ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា ព្រមទាំងឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ និងតំណាងអង្គភាពប្រឆាំងអំពើពុករលួយ ក្នុងពិធីបើកវិញ្ញាសាប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី១០-១១ ខែសីហា ឆ្នាំ២០២៦ នៅវិទ្យាល័យព្រះសីសុវត្ថិ រាជធានីភ្នំពេញ។

ការប្រឡងសញ្ញាបត្រមធ្យមសិក្សាទុតិយភូមិ ឬហៅថា ការប្រឡងបាក់ឌុប គឺជាការប្រឡងដ៏មានសារៈសំខាន់សម្រាប់សិស្សានុសិស្សថ្នាក់ទី១២ ក្នុងការវាស់ស្ទង់ចំណេះដឹង និងសមត្ថភាពដែលបានសិក្សារយៈពេលកន្លងមក ព្រមទាំងជាមូលដ្ឋានសម្រាប់បន្តការសិក្សានៅគ្រឹះស្ថានឧត្តមសិក្សា និងការត្រៀមខ្លួនចូលទៅក្នុងទីផ្សារការងារ។

ក្នុងឱកាសនេះ ការប្រឡងត្រូវបានរៀបចំឡើងដោយផ្តោតសំខាន់លើការរក្សាសណ្តាប់ធ្នាប់ សុវត្ថិភាព និងបរិយាកាសល្អប្រសើរ ដើម្បីធានាឱ្យបេក្ខជនអាចប្រឡងដោយមានភាពស្ងប់ស្ងាត់ និងផ្តោតអារម្មណ៍លើការបំពេញវិញ្ញាសារបស់ខ្លួន។

ជាមួយគ្នានេះ ការប្រឡងសញ្ញាបត្រមធ្យមសិក្សាទុតិយភូមិ ត្រូវបានអនុវត្តដោយឈរលើគោលការណ៍ ច្បាប់ យុត្តិធម៌ តម្លាភាព និងលទ្ធផលទទួលយកបាន ដោយធានាឱ្យដំណើរការប្រឡងប្រព្រឹត្តទៅដោយស្មើភាព និងគ្មានការរើសអើងចំពោះបេក្ខជន។

ការប្រឡងឆ្នាំ២០២៦នេះ ក៏បន្តប្រកាន់ខ្ជាប់នូវគោលការណ៍សំខាន់របស់ក្រសួងអប់រំ យុវជន និងកីឡា គឺ «អ្នកចេះ គឺជាប់» ដែលផ្តល់តម្លៃដល់សមត្ថភាព និងចំណេះដឹងពិតប្រាកដរបស់សិស្សានុសិស្ស។

ការចូលរួមរបស់ថ្នាក់ដឹកនាំ និងស្ថាប័នពាក់ព័ន្ធក្នុងការបើកវិញ្ញាសាប្រឡងនៅវិទ្យាល័យព្រះសីសុវត្ថិ ក៏ជាការបង្ហាញពីការយកចិត្តទុកដាក់ខ្ពស់ចំពោះការអនុវត្តដំណើរការប្រឡងឱ្យបានត្រឹមត្រូវ ស្របតាមបទប្បញ្ញត្តិ និងធានាបាននូវភាពជឿទុកចិត្តពីសំណាក់សិស្សានុសិស្ស អាណាព្យាបាល និងសាធារណជន។

សម្រាប់បេក្ខជនទាំងអស់ ដែលកំពុងចូលរួមប្រឡងក្នុងរយៈពេលពីរថ្ងៃ គួររក្សាស្មារតីស្ងប់ស្ងាត់ អានវិញ្ញាសាឱ្យបានច្បាស់លាស់ គ្រប់គ្រងពេលវេលាឱ្យបានល្អ និងប្រើប្រាស់ចំណេះដឹងដែលបានខិតខំរៀនសូត្រកន្លងមក ដើម្បីបំពេញវិញ្ញាសាឱ្យបានល្អប្រសើរ។
សូមជូនពរបេក្ខជនទាំងអស់ ទទួលបានជោគជ័យក្នុងការប្រឡង និងសម្រេចបានលទ្ធផលល្អតាមការខិតខំប្រឹងប្រែងរបស់ខ្លួន!