ទំនិញគ្រប់ប្រភេទ ចំនួន២២៥គីឡូក្រាមត្រូវដុតបំផ្លាញចោល
ខេត្តស្ទឹងត្រែង៖ ទំនិញខូចគុណភាព និងផលិតផលហួសកាលបរិច្ឆេទប្រើប្រាស់ សរុបចំនួន ២២៥គីឡូក្រាម ត្រូវបានមន្ត្រីជំនាញនៃសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ ហៅកាត់ថា(ក.ប.ប.) ខេត្តស្ទឹងត្រែង ដុតបំផ្លាញចោល ដើម្បីបង្ហាញឱ្យប្រជាពលរដ្ឋលើកកម្ពស់ប្រុងប្រយ័ត្ន នៅពេលទិញយកទៅប្រើប្រាស់ ។
ក្នុងសកម្មភាពដុតចោលនៅទំនិញខូចគុណភាពធ្វើឡើងនៅរណ្តៅដី ស្ថិតនៅវាលព្រលានយន្តហោះ ក្នុងភូមិស្រែពោធិ៍ សង្កាត់ស្រះឬស្សី ក្រុងខេត្តស្ទឹងត្រែង កាលពីថ្ងៃទី១៨កញ្ញា ២០២៦កន្លងមកនេះ លោក ហេង មាលី ប្រធាន ក.ប.ប. សាខាខេត្តបានបញ្ចាក់ថា ទំនិញទាំងនោះ គឺបានមកពីលទ្ធផលនៃការចុះត្រួតពិនិត្យ និងប្រមូលដកហូតពីទីផ្សារ ផ្ទះអាជីវករ ហាងម៉ាត និងហាងលក់ទំនិញនានា នៅក្នុងខេត្ត រយៈពេល៩ខែឆ្នាំ២០២៦ កន្លងមកនេះ។
លោកបន្តថា៖ការបំផ្លាញចោល ក្នុងគោលបំណងបង្ហាញទៅដល់ក្រុមអាជីវករ អ្នកចែកចាយ លក់ដុំ និងលក់រាយទាំងអស់ មុននាំទំនិញចូលមកលក់ ត្រូវពិនិត្យឱ្យបានច្បាស់លាស់រាល់ផលិតផលទំ
និញឱ្យស្គាល់ប្រភពផលិតត្រឹមត្រូវ ។
លោកពិនិត្យឃើញថាមានទំនិញមួយចំនួនបងប្អូនអាជីវករបានលួចលាយបន្ថែមនូវសារធាតុគីមីហាមឃាត់ ដែលគ្មានបទប្បញ្ញត្តិបច្ចេកទេស ទៅលើផលិតផលម្ហូបអាហារ ជាហេតុបង្កផលប៉ះពាល់ធ្ងន់ធ្ងរដល់សុខភាព និងសុវត្ថិភាពរបស់អ្នកប្រើប្រាស់ ករណីនេះត្រូវ ហាមឃាត់ជាដាច់ខាត ។
លោកស្រីចាន់ រដ្ឋា អ្នកលក់ចំណីអាហារនៅផ្សារថ្មីក្រុងស្ទឹងត្រែង ហៅផ្សារអូឬស្សី បានគាំទ្រ
មន្ត្រីជំនាញអនុវត្តការងារនេះបានល្អ ព្រោះបានជំរុញឱ្យបងប្អូនអាជីវករយកចិត្តទុកដាក់នាំទំនិញល្អៗយកមកលក់ ហើយអ្នកទិញយកទៅប្រើប្រាស់ និងបរិភោគគ្មានផលប៉ះពាល់ដល់សុខភាពផងដែរ។
សូមញ្ជាក់ថា៖ជាមួយនិងការដុតចោលទំនិញខូចគុណភាពនេះ មន្ត្រី ក.ប.ប. សាខាខេត្តស្ទឹងត្រែង បានលើកទឹកចិត្តដល់បងប្អូនប្រជាពលរដ្ឋ ប្រសិនបើប្រទះឃើញ ឬសង្ស័យមានការចរាចរណ៍ផលិតផលបង្កផលប៉ះពាល់ដល់សុខភាព សូមជួយផ្តល់ព័ត៌មានបន្ទាន់តាមរយៈប្រព័ន្ធ Hot line លេខ ១២ ៦៦ របស់ក្រសួងពាណិជ្ជកម្ម ដើម្បីរួមសហការគ្នាលប់បំបាត់ទំនិញក្លែងក្លាយ ៕
ដោយ កុល សារត្ន័ សហការី រស្មីញូស៍ប្រចាំខត្ត ស្ទឹងត្រែង ថ្ងៃទី១៩ កញ្ញាឆ្នាំ២០២៦
