«នគរសង្ក្រាន្ត» បើកឆាកយ៉ាងអធិកអធមនៅភ្នំពេញ ពង្រឹងស្មារតីសាមគ្គីជាតិ
ភ្នំពេញ៖ ព្រឹត្តិការណ៍ «នគរសង្ក្រាន្ត» ត្រូវបានរៀបចំឡើងយ៉ាងអធិកអធមនៅរាជធានីភ្នំពេញ ក្នុងឱកាសអបអរសាទរពិធីបុណ្យចូលឆ្នាំប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៦៩-២៥៧០។
ក្នុងឱកាសអញ្ជើញជាអធិបតីក្នុងពិធីទទួលទេវតាឆ្នាំថ្មី នាថ្ងៃទី១៤ ខែមេសា ឆ្នាំ២០២៦ នៅរមណីយដ្ឋានប្រវត្តិសាស្ត្រវត្តភ្នំ ឯកឧត្តម Hun Many ប្រធានសហភាពសហព័ន្ធយុវជនកម្ពុជា បានមានប្រសាសន៍ថា ខ្លឹមសារសំខាន់នៃព្រឹត្តិការណ៍ «នគរសង្ក្រាន្ត» គឺបង្កើនស្មារតីសាមគ្គីជាតិ ដោយឈរជាមួយជាតិ កងកម្លាំងវីរកងទ័ព និងវីរនគរបាល ព្រមទាំងបងប្អូនប្រជាពលរដ្ឋភៀសសឹកគ្រប់កាលៈទេសៈ។
ពិធីទទួលទេវតាឆ្នាំថ្មីនេះ គឺជាការស្វាគមន៍ទេវតាឆ្នាំមមី ព្រះនាម «រាក្យសាទេវី» ដែលជាបុត្រីទី៣ នៃកបិលមហាព្រហ្ម បានយាងចុះមកគ្រងជម្ពូទ្វីប
តាមប្រពៃណីខ្មែរ។
គួរបញ្ជាក់ថា ព្រឹត្តិការណ៍ «នគរសង្ក្រាន្ត» នឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ នៅរាជធានីភ្នំពេញ ដែលជាបេះដូងនៃព្រះរាជាណាចក្រកម្ពុជា ដោយមានកម្មវិធីវប្បធម៌ កម្សាន្ត និងសកម្មភាពជាច្រើន ដើម្បីលើកកម្ពស់អត្តសញ្ញាណជាតិ និងទាក់ទាញភ្ញៀវទេសចរជាតិ និងអន្តរជាតិ៕
