របាំកន្តែរ៉ែ រំលេចសម្រស់វប្បធម៌ខ្មែរ ក្នុងបរិយាកាសសប្បាយរីករាយនៅវត្តភ្នំ
ភ្នំពេញ ៖ នៅក្នុងបរិយាកាសអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៦ ថ្ងៃទី២ ដែលត្រូវនឹងថ្ងៃវារៈវ័នបត ឆ្នាំមមី អដ្ឋស័ក ព.ស.២៥៧០ កម្មវិធីសិល្បៈវប្បធម៌ជាច្រើនត្រូវបានរៀបចំយ៉ាងអធិកអធម នៅតំបន់រមណីយដ្ឋានប្រវត្តិសាស្រ្តវត្តភ្នំ និងតំបន់ផ្លូវថ្មើរជើងចតុមុខ ដើម្បីផ្តល់ភាពសប្បាយរីករាយដល់ប្រជាពលរដ្ឋ និងភ្ញៀវទេសចរជាតិ-អន្តរជាតិ។
ក្នុងនោះ «របាំកន្តែរ៉ែ» ដែលមានដើមកំណើតពីខេត្តកំពង់ស្ពឺ ត្រូវបាននាំមកសម្តែងជាពិសេស ដោយទាក់ទាញការចាប់អារម្មណ៍យ៉ាងខ្លាំងពីសំណាក់អ្នកចូលរួម។ របាំនេះជារបាំប្រពៃណីមួយដែលមានចលនារាំរស់រវើក សប្បាយរីករាយ និងត្រូវបានបង្កើតឡើងដោយក្រុមអ្នកប្រមាញ់តាំងពីបុរាណ ។
សិល្បករ និងសិល្បការិនីបានបង្ហាញការសម្តែងយ៉ាងល្អឥតខ្ចោះ ខណៈដែលភ្ញៀវទេសចរជាតិ និងអន្តរជាតិ បានចូលរួមទស្សនា និងចូលលេងល្បែងប្រជាប្រិយខ្មែរជាច្រើនប្រភេទ ក្នុងបរិយាកាសពោរពេញដោយស្នាមញញឹម និងសម្លេងអបអរសាទរ។
ជាពិសេស នៅតំបន់ផ្លូវថ្មើរជើងចតុមុខ បានប្រែជាទីកន្លែងកម្សាន្តដ៏រស់រវើក ពោរពេញដោយសម្លេងហ៊ោកញ្ជ្រៀវ និងការសើចសប្បាយរីករាយ។ ការរៀបចំល្បែងប្រជាប្រិយដូចជា ចាប់ក្រពើ បោះអង្គញ់ និងល្បែងបុរាណផ្សេងៗ បានរួមចំណែកបង្កើនស្មារតីសាមគ្គីភាព និងការចងចាំអំពីវប្បធម៌ជាតិ។
គួរបញ្ជាក់ថា ការរៀបចំព្រឹត្តិការណ៍សិល្បៈ និងល្បែងប្រជាប្រិយខ្មែរ ក្នុងឱកាសបុណ្យចូលឆ្នាំថ្មី មិនត្រឹមតែផ្តល់នូវភាពសប្បាយរីករាយប៉ុណ្ណោះទេ ប៉ុន្តែជាការចូលរួមសំខាន់ក្នុងការថែរក្សា និងផ្សព្វផ្សាយមរតកវប្បធម៌ដ៏មានតម្លៃរបស់ជាតិឲ្យនៅតែរស់រវើក ក្នុងចំណោមយុវជនជំនាន់ក្រោយ និងលើឆាកអន្តរជាតិ៕
