ខេត្តស្ទឹងត្រែងធ្វើការតបស្នង ដឹងគុណចំពោះជនចូលនិវត្តជន
ជនចូលនិវត្តនៅខេត្តស្ទឹងត្រែងជាង៦៩០នាក់ត្រូវបានថ្នាក់ដឹកនាំមន្ត្រីរាជការធ្វើការតបស្នង ដឹងគុណដើម្បីបង្ហាញពីគំរូដ៍ល្អដល់អ្នកជំនាន់ក្រោយ ឱ្យធ្វើការប្រតិបត្តិតាម និងបានរក្សាជាវប្បធ៌មថ្មីមួយសម្រាប់អ្នកបន្តវេន ។
ក្នុងពិធីអបអរសាទរ សំណេះសំណាលនិងពិសារអាហារសាមគ្គី ដើម្បីអបអរសាទរខួបលើកទី១៩ទិវាអតីតយុទ្ធជន ធ្វើឡើងនៅភោជនីយដ្ឋានសុខសម្បត្តិកងចក្រ នៅខេត្តស្ទឹងត្រែងថ្ងៃទី១២ឧសភាឆ្នាំ២០២៦ ឯកឧត្តម ផៃ ប៊ុនឈឿន រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធាន ក្រុមការងាររបស់រាជរដ្ឋាភិបាលចុះជួយខេត្តស្ទឹងត្រែងមានប្រសាសន៍ថា៖ ពិធីដ៍មានតម្លៃនេះ អង្គភាពពាក់ព័ន្ធ ដែលមានតួនាទីសម្រាប់ធ្វើពិធីខួបអនុស្សាវរីយ៍នៅឆ្នាំក្រោយ បន្តបន្ទាប់ទៀត ត្រូវយកប្រធានបទមួយនេះទៅរៀបចំពិធីមួយឲ្យមានភាពល្អប្រសើរ ឱ្យក្លាយទៅជាវប្បធម៌នៅខេត្តស្ទឹងត្រែងរបស់យើងនៅឆ្នាំខាងមុខទៀត(សំឡេង) ដែលទៅថ្ងៃមុខទៀត ក្មេងៗយុវជនជំនាន់ក្រោយអ្នកបន្តវេន ត្រូវគិតធ្វើយ៉ាងម៉េច ការវិវត្តនៃសង្គមរបស់យើង ការវិវត្តនៃវប្បធម៌របស់យើង ការវិវត្តនៅប្រពៃណីរបស់យើងការវិវត្តនៃជំនឿរបស់យើង ការវិវត្តនៃការគោរពចាស់ទុំរបស់យើងនេះ នឹងក្លាយទៅជាប្រពៃណីដ៏ល្អ និងសង្ឃឹមថា ការរៀបចំ នៅថ្ងៃនេះ នឹងមានផលប្រយោជន៍ទៅថ្ងៃមុខ។
ឯកឧត្តមសរសុពុត្រា អភិបាលខេត្ត មានប្រសាសន៍បន្តថា៖អ្វីដែលយើងបានប្រារព្ធធ្វើថ្ងៃនេះគឺជាពុម្ភមួយសម្រាប់យុវជនជំនាន់ក្រោយ តោងការដឹងគុណ ការតបស្នងនូវឧបការគុណ ជាកត្តាកំណត់ តម្លៃក្នុង ក្រមសីលធម៌ ដែលជាការទទួលខុសត្រូវរបស់បុគ្គលម្នាក់ៗ(សំឡេង) អីចឹងអ្វីដែលយើងធ្វើនៅថ្ងៃនេះសង្ឃឹមថាពេលយើងទាំងអស់គ្នាចូលនិវត្តទៅនៅថ្ងៃក្រោយ យុវជនជំនាន់ក្រោយនឹងធ្វើទង្វើទាំងអស់នេះសម្រាប់ ពួកយើងខ្ញុំទាំងអស់គ្នា បានន័យថាធ្វើថ្ងៃនេះ ដើម្បីសម្រាប់លោកអ៊ំលោកពូអ្នកមីងផង និងខ្លួនឯងនៅពេលដែលយើងចូលនិវត្តទៅផងដែរ។
សូមបញ្ចាក់ថា៖ពិធីនេះរៀបចំឡើងក្រោមវត្តមានថ្នាក់ដឹកនាំ ព្រះសង្ឃ ចាស់ទុំ ព្រឹទ្ធាចារ្យ មន្ត្រីរាការនិងជនចូលនិវត្ត សរុបចំនួនជាង៥០០នាក់ ក្នុងនោះនិវត្តជនជាង៣០០នាក់ក្នុងម្នាក់ៗទទួលបានថវិកា១០ម៉ឺនរៀល សារប៊ូ២ដប ដបទឹកក្តៅ១ និងភួងផ្កាមួយផងដែរ ។
ដោយ ÷ កុល សារត្ន័ ស្ទឹងត្រែង ថ្ងៃទី១២ ឧសភាឆ្នាំ២០២៦
