កម្លាំងកងរាជអាវុធហត្ថរាជធានីភ្នំពេញ ចូលរួមការពារសន្តិសុខ សុវត្ថិភាព និងដឹកជញ្ជូនគ្រឿងញៀនជាង ៤,៦១តោន ទៅដុតបំផ្លាញ
រាជធានីភ្នំពេញ៖ នៅវេលាម៉ោង ០៧:៣០នាទីព្រឹក ថ្ងៃទី២១ ខែកក្កដា ឆ្នាំ២០២៦ កម្លាំងកងរាជអាវុធហត្ថរាជធានីភ្នំពេញ បានចូលរួមការពារសន្តិសុខ សុវត្ថិភាព រក្សាសណ្តាប់ធ្នាប់ និងសម្របសម្រួលដឹកជញ្ជូនគ្រឿងញៀន សារធាតុគីមីផ្សំ សារធាតុគីមី និងសម្ភារៈវេចខ្ចប់ ដែលមានទម្ងន់សរុប ៤,៦១តោន ចេញពីអាគារសាលាយុត្តិធម៌រាជធានីភ្នំពេញ ទៅកាន់ទីតាំងដុតបំផ្លាញគ្រឿងញៀន ស្ថិតនៅភូមិតាគោក ឃុំឈ្វាំង ស្រុកពញាឮ ខេត្តកណ្តាល។
សកម្មភាពនេះ ត្រូវបានអនុវត្តក្នុងឱកាសប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន និងពិធីដុតបំផ្លាញគ្រឿងញៀន ដើម្បីធានាឱ្យដំណើរការដឹកជញ្ជូន និងការដុតបំផ្លាញគ្រឿងញៀនប្រព្រឹត្តទៅដោយសុវត្ថិភាព មានសណ្តាប់ធ្នាប់ និងប្រកបដោយប្រសិទ្ធភាព។
ពិធីដុតបំផ្លាញគ្រឿងញៀននេះ បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
ការចូលរួមរបស់កម្លាំងកងរាជអាវុធហត្ថរាជធានីភ្នំពេញ ក្នុងការការពារសន្តិសុខ សុវត្ថិភាព រក្សាសណ្តាប់ធ្នាប់ និងគាំទ្រដល់ការដឹកជញ្ជូនគ្រឿងញៀនទៅដុតបំផ្លាញនេះ បានបង្ហាញពីការយកចិត្តទុកដាក់ និងការចូលរួមយ៉ាងសកម្មរបស់កងកម្លាំង ក្នុងការប្រយុទ្ធប្រឆាំងគ្រឿងញៀន និងការពារសន្តិសុខ សុវត្ថិភាពជូនប្រជាពលរដ្ឋ។
