លោកឧត្តមសេនីយ៍ឯក រ័ត្ន ស្រ៊ាង អញ្ជើញចូលរួមពិធីសំណេះសំណាល និងចែកបណ្ណសមធម៌សុខាភិបាលជូនប្រជាពលរដ្ឋនៅខណ្ឌមានជ័យ
ភ្នំពេញ៖ នាព្រឹកថ្ងៃទី១១ ខែសីហា ឆ្នាំ២០២៦ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានអញ្ជើញចូលរួមពិធីសំណេះសំណាល និងចែកបណ្ណសមធម៌សុខាភិបាល ជូនប្រជាពលរដ្ឋ។
ពិធីនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ស្ថិតនៅភូមិព្រែកទាល់ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។
ការចូលរួមក្នុងពិធីនេះ បានបង្ហាញពីការយកចិត្តទុកដាក់ និងការចូលរួមចំណែករបស់កងរាជអាវុធហត្ថរាជធានីភ្នំពេញ ក្នុងការគាំទ្រសកម្មភាពសង្គម និងកម្មវិធីដែលមានគោលបំណងលើកកម្ពស់សុខុមាលភាព និងជីវភាពរស់នៅរបស់ប្រជាពលរដ្ឋ ជាពិសេសប្រជាពលរដ្ឋដែលមានជីវភាពខ្វះខាត និងត្រូវការការគាំពារផ្នែកសុខាភិបាល។
បណ្ណសមធម៌សុខាភិបាល គឺជាផ្នែកមួយនៃយន្តការគាំពារសង្គម ដែលជួយសម្រួលដល់ប្រជាពលរដ្ឋដែលមានជីវភាពក្រីក្រ និងងាយរងគ្រោះ អាចទទួលបានសេវាសុខាភិបាលតាមរយៈប្រព័ន្ធគាំពារសង្គមរបស់រាជរដ្ឋាភិបាល។
ពិធីសំណេះសំណាល និងចែកបណ្ណសមធម៌សុខាភិបាលនាពេលនេះ ក៏បានរួមចំណែកបង្កើនការយល់ដឹងរបស់ប្រជាពលរដ្ឋអំពីសារៈសំខាន់នៃការទទួលបានសេវាសុខាភិបាល និងការប្រើប្រាស់អត្ថប្រយោជន៍ពីបណ្ណសមធម៌សុខាភិបាលឱ្យបានត្រឹមត្រូវ និងមានប្រសិទ្ធភាព។
ក្នុងឱកាសនោះផងដែរ លោកឧត្តមសេនីយ៍ឯក រ័ត្ន ស្រ៊ាង និងថ្នាក់ដឹកនាំ ព្រមទាំងអ្នកពាក់ព័ន្ធ បានចូលរួមសំណេះសំណាល សួរសុខទុក្ខ និងបង្ហាញការយកចិត្តទុកដាក់ចំពោះប្រជាពលរដ្ឋក្នុងមូលដ្ឋាន ដោយរួមគ្នាលើកកម្ពស់សុខុមាលភាព និងការគាំពារសង្គមនៅមូលដ្ឋាន៕
