រូបបដិមាព្រះនារាយណ៍ នៅទីតាំងរង្វង់មូលគីឡូ 4 សាងសង់រួចរាល់ហើយ

 រូបបដិមាព្រះនារាយណ៍ នៅទីតាំងរង្វង់មូលគីឡូ 4 សាងសង់រួចរាល់ហើយ

ខេត្តស្ទឹងត្រែង  -រូបបដិមាព្រះនារាយណ៍​ បានសាងសង់ហើយនៅកណ្តាល រង្វង់មូលគីឡូ៤ ដើម្បីយាងបរមីព្រះអង្គ ឱ្យជួយគ្រប់គ្រង រក្សាទឹកដី និងប្រជាជនកម្ពុជា ប្រកបដោយសេចក្តីសុខ និងសេចក្តីចម្រើន គ្រប់ប្រការ តរៀងទៅ ។ 

      ​ ក្នុងឱកាសចុះពិនិត្យ រូបបដិមាព្រះនារាយណ៍ នៅរង្វង់មូលថ្មីគីឡូ៤ ទើបសាងសង់ហើយ  នៅភូមិរាជានុកូល សង្កាត់-ក្រុង-ខេត្តស្ទឹងត្រែង ឯកឧត្តម សរ សុពុត្រា អភិ​បាលខេត្ត មានប្រសាសន៍ថា រូបបដិមាព្រះនារាយណ៍ ​បានយាងទៅគង់នៅសារមន្ទីរជាតិ រាជធានីភ្នំពេញ  អស់រយៈពេលយ៉ាងយូរ មក​ហើយ ។
      ឯកឧត្តមមានប្រសាសន៍ទៀតថា ដើម្បី​គោរពប្រតិបត្តិ ក៏ដូចជាការរឮក ដឹងគុណរបស់ព្រះអង្គ ​ក្នុងការរក្សាទឹកដីនៃព្រះរាជាណាចក្រកម្ពុជា កូនចៅបានសាងសង់រូបសំណាក់ថ្មី ក្នុងទម្រង់ និងរចនាបថដើម  ​ដាក់នៅចំកណ្តាលរង្វង់មូលគីឡូ៤ នៅលើទឹកដីនៃខេត្តស្ទឹងត្រែង (ឦសានធានី នៃដែនសុវណ្ណភូមិ) ដើម្បី​យាងលោកមកគ្រប់គ្រង រក្សាទឹកដី និងប្រជាជនកម្ពុជា ប្រកបដោយសេចក្តីសុខ និងសេចក្តីចម្រើន គ្រប់ប្រការ ។   
        លោក គឹម ធី ប្រជាពលរដ្ឋរស់នៅភូមិរាជានុកូលក្រុងស្ទឹងត្រែងបានគាំទ្រ​គំនិតផ្តួចផ្តើមដ៍វៃឆ្លាត របស់អភិបាលខេត្ត ដែលបានសាងសង់រង្វង់មូល​គីឡូ៤នេះឡើង​ ហើយថែមទាំងបន្ថែមឱ្យមានរូបបដិមាព្រះនារាយណ៍ ​ធ្វើឱ្យខេត្តស្ទឹងត្រែងឦសានធានី មានរូបមរតកជាប្រវត្តិសាស្ត្រនេះ។
      លោកបន្តថា ក្នុងនាមប្រជាពលរដ្ឋនៅចំណុចនេះ សូមឱ្យអ្នកបើកបរទាំងអស់មកដល់​​​​រង្វង់មូល ត្រូវគោរពច្បាប់ចរាចរណ៍ បើកបរ​បន្ថយល្បឿនទាំងម៉ូតូ និងរថយន្ត ដើម្បី​បញ្ចៀសការគ្រោះថ្នាក់ទាំងអស់គ្នា  ព្រោះអភិបាលខេត្ត បានរៀបចំប្រព័ន្ធសុវត្ថិភាព ឱ្យមាននៅទីនេះហើយ  ។
    សូមបញ្ជាក់ថា នេះជាសមិទ្ធផល​ថ្មីមួយទៀត ទើបសាងសង់រួចរាល់  បង្ហាញពីការលើកកម្ពស់ថែរក្សាមរតកជាប្រវត្តិសាស្ត្រផង   និង​មានប្រយោជន៍ឱ្យកូនចៅជំនាន់ក្រោយបានឃើញបានស្គាល់  រូបបដិមាព្រះនារាយណ៍  និងបង្ការបានការគ្រោះថ្នាក់ចរាចរណ៍បន្ថែមទៀត៕
  ដោយ÷ កុល សារត្ន័ សហការីរស្មីញូស៍  ប្រចាំខេត្ត ស្ទឹងត្រែង ​។