ផ្ទេរទណ្ឌិត ៦០នាក់ ពីមណ្ឌលអប់រំកែប្រែទី៣ ទៅពន្ធនាគារខេត្តក្រចេះ និងព្រៃវែង ដើម្បីបន្ធូរភាពចង្អៀតណែន
នៅព្រឹកថ្ងៃទី១៧ ខែមីនា ឆ្នាំ២០២៦ អគ្គនាយកដ្ឋានពន្ធនាគារ បានសហការជាមួយស្នងការដ្ឋាននគរបាលខេត្តត្បូងឃ្មុំ ខេត្តក្រចេះ និងខេត្តព្រៃវែង ព្រមទាំងសមត្ថកិច្ចពាក់ព័ន្ធគ្រប់ជាន់ថ្នាក់ ធ្វើការផ្ទេរ និងដឹកជញ្ជូនជនជាប់ឃុំចំនួន ៦០នាក់ ចេញពីមណ្ឌលអប់រំកែប្រែទី៣ ទៅកាន់ពន្ធនាគារខេត្តក្រចេះ និងពន្ធនាគារខេត្តព្រៃវែង ដើម្បីបន្ធូរភាពចង្អៀតណែននៅក្នុងមណ្ឌល។
ប្រតិបត្តិការផ្ទេរទណ្ឌិតនេះ ត្រូវបានអនុវត្តក្រោមការអនុញ្ញាតជាគោលការណ៍ដ៏ខ្ពង់ខ្ពស់ពី ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ។
ក្នុងនោះ ទណ្ឌិតចំនួន ៣០នាក់ ត្រូវបានផ្ទេរទៅកាន់ពន្ធនាគារខេត្តក្រចេះ និងទណ្ឌិតចំនួន ៣០នាក់ទៀត ត្រូវបានផ្ទេរទៅកាន់ពន្ធនាគារខេត្តព្រៃវែង ដោយដំណើរការផ្ទេរនេះ បានអនុវត្តក្រោមការចុះបញ្ជាផ្ទាល់ពី លោក វរអគ្គានុរក្សថ្នាក់លេខ១ សោម បញ្ញា ប្រធានការិយាល័យសន្តិសុខ នៃអគ្គនាយកដ្ឋានពន្ធនាគារ។
ការផ្ទេរទណ្ឌិតខាងលើ មានគោលបំណងសំខាន់ក្នុងការរៀបចំការគ្រប់គ្រងទណ្ឌិតឱ្យមានប្រសិទ្ធភាព និងបន្ធូរភាពចង្អៀតណែននៅមណ្ឌលអប់រំកែប្រែទី៣។
រូបភាព៖ មណ្ឌលអប់រំកែប្រែទី៣ ពន្ធនាគារខេត្តក្រចេះ និងពន្ធនាគារខេត្តព្រៃវែង។
