អាវុធហត្ថរាជធានីភ្នំពេញ បង្ក្រាបជនសង្ស័យ៤នាក់ ពាក់ព័ន្ធករណីគ្រឿងញៀន ២ករណីផ្សេងគ្នា
ភ្នំពេញ៖ កម្លាំងកងរាជអាវុធហត្ថរាជធានីភ្នំពេញ បានបង្ហាញមុខជនសង្ស័យចំនួន ៤នាក់ ពាក់ព័ន្ធករណីគ្រឿងញៀន ២ករណីផ្សេងគ្នា នៅថ្ងៃទី២៩ ខែកក្កដា ឆ្នាំ២០២៦ បន្ទាប់ពីបានឃាត់ខ្លួនជាបន្តបន្ទាប់។ ក្នុងចំណោមជនសង្ស័យទាំង៤នាក់ មាន៣នាក់ត្រូវបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ខណៈជនសង្ស័យម្នាក់ទៀត ត្រូវបានបញ្ជូនទៅមជ្ឈមណ្ឌលកែប្រែផ្តាច់សារធាតុញៀន។
ករណីទី១ កម្លាំងការិយាល័យប្រឆាំងបទល្មើសគ្រឿងញៀន នៃកងរាជអាវុធហត្ថរាជធានីភ្នំពេញ សហការជាមួយមូលដ្ឋានអាវុធហត្ថខណ្ឌមានជ័យ បានចុះបង្ក្រាប និងឃាត់ខ្លួនជនសង្ស័យចំនួន៣នាក់ ពាក់ព័ន្ធករណីរក្សាទុក និងប្រើប្រាស់ដោយខុសច្បាប់នូវសារធាតុញៀន។ ប្រតិបត្តិការនេះធ្វើឡើងនៅថ្ងៃទី២៧ ខែកក្កដា ឆ្នាំ២០២៦ ត្រង់ចំណុចខ្ទមទុកចោល ស្ថិតក្នុងភូមិព្រែកទាល់ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។
ជនសង្ស័យទាំង៣នាក់ រួមមាន៖
- ឈ្មោះ កែវ សុធា អាយុ ៤០ឆ្នាំ
- ឈ្មោះ ម៉េង ថាវរី អាយុ ៣០ឆ្នាំ
- ឈ្មោះ វី ដាវីន អាយុ ២១ឆ្នាំ
សមត្ថកិច្ចដកហូតវត្ថុតាងបានរួមមាន ក្រាមសថ្លាចំនួន៤កញ្ចប់ ដបសម្រាប់ជក់គ្រឿងញៀនចំនួន១ និងសម្ភារពាក់ព័ន្ធមួយចំនួនទៀត។ ជនសង្ស័យទាំង៣នាក់ ត្រូវបានកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់។
ករណីទី២ កាលពីវេលាម៉ោង ៧:៤៥នាទីព្រឹក ថ្ងៃទី២៨ ខែកក្កដា ឆ្នាំ២០២៦ កម្លាំងអាវុធហត្ថរាជធានីភ្នំពេញ បានទទួលព័ត៌មានតាមរយៈលេខទូរស័ព្ទបន្ទាន់ ១២៩១ ពីប្រជាពលរដ្ឋ រាយការណ៍ថា បុរសម្នាក់ឈ្មោះ លី វីណា អាយុ ២៨ឆ្នាំ មានសភាពបែកថ្នាំ ធ្វើសកម្មភាពអុកឡុក និងបង្កហិង្សាក្នុងគ្រួសារ នៅភូមិសាក់សំពៅ សង្កាត់សាក់សំពៅ ខណ្ឌដង្កោ រាជធានីភ្នំពេញ។
ក្រោយទទួលបានព័ត៌មាន កម្លាំងអាវុធហត្ថមូលដ្ឋានខណ្ឌដង្កោ បានចុះអន្តរាគមន៍ភ្លាមៗ ឃាត់ខ្លួនជនបង្ក និងបញ្ជូនទៅមជ្ឈមណ្ឌលកែប្រែផ្តាច់សារធាតុញៀន ស្រុកកណ្ដាលស្ទឹង ដើម្បីទទួលការព្យាបាល និងស្តារនីតិសម្បទាតាមនីតិវិធី។
