អាវុធហត្ថរាជធានីភ្នំពេញ ឃាត់ខ្លួនជនសង្ស័យម្នាក់ ពាក់ព័ន្ធករណីគាស់ផ្ទះលួចទ្រព្យសម្បត្តិ នៅខណ្ឌច្បារអំពៅ
ភ្នំពេញ៖ កម្លាំងអាវុធហត្ថរាជធានីភ្នំពេញ ក្នុងមូលដ្ឋានខណ្ឌច្បារអំពៅ បានឃាត់ខ្លួនជនសង្ស័យម្នាក់ ពាក់ព័ន្ធករណីគាស់ផ្ទះចូលលួចទ្រព្យសម្បត្តិ បន្ទាប់ពីបានទទួលព័ត៌មាន និងឃើញការផ្សព្វផ្សាយតាមបណ្ដាញសង្គម។
ករណីនេះបានកើតឡើងកាលពីថ្ងៃទី៥ ខែកក្កដា ឆ្នាំ២០២៦ នៅចំណុចខាងក្រោយវត្តច្បារអំពៅ ស្ថិតក្នុងភូមិដើមស្លែង សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ដោយក្រុមជនសង្ស័យចំនួន២នាក់ បានធ្វើសកម្មភាពគាស់ផ្ទះចូលលួចទ្រព្យសម្បត្តិរបស់ប្រជាពលរដ្ឋ។
ក្រោយទទួលបានព័ត៌មាន កម្លាំងអាវុធហត្ថរាជធានីភ្នំពេញ ក្នុងមូលដ្ឋានខណ្ឌច្បារអំពៅ បានចុះស្រាវជ្រាវ និងស៊ើបអង្កេត ដើម្បីស្វែងរកអត្តសញ្ញាណ និងទីតាំងរបស់ក្រុមជនសង្ស័យយកមកចាត់ការតាមច្បាប់។
ជាលទ្ធផល នៅវេលាម៉ោង ៥៖០០នាទីល្ងាច ថ្ងៃទី១៣ ខែកក្កដា ឆ្នាំ២០២៦ កម្លាំងមូលដ្ឋានអាវុធហត្ថខណ្ឌច្បារអំពៅ បានឈានដល់ការឃាត់ខ្លួនជនសង្ស័យម្នាក់ ឈ្មោះ កូយ សំណាង ហៅ ណាង ភេទប្រុស អាយុ៣២ឆ្នាំ និងបានបញ្ជូនទៅការិយាល័យជំនាញ នៃកងរាជអាវុធហត្ថរាជធានីភ្នំពេញ ដើម្បីចាត់ការតាមនីតិវិធី។
តាមការសាកសួរជំនាញ ជនសង្ស័យបានសារភាពថា ខ្លួន និងបក្ខពួកម្នាក់ទៀត ពិតជាបានធ្វើសកម្មភាពគាស់ផ្ទះចូលលួចទ្រព្យសម្បត្តិរបស់ជនរងគ្រោះ នៅទីតាំងខាងលើប្រាកដមែន។
បច្ចុប្បន្ន ជនសង្ស័យត្រូវបានកម្លាំងជំនាញការិយាល័យព្រហ្មទណ្ឌ នៃកងរាជអាវុធហត្ថរាជធានីភ្នំពេញ កសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់។ ដោយឡែក បក្ខពួកដែលកំពុងរត់គេចខ្លួន កម្លាំងអាវុធហត្ថរាជធានីភ្នំពេញ កំពុងបន្តស្រាវជ្រាវតាមចាប់ខ្លួនយកមកចាត់ការតាមច្បាប់៕
